Month: June 2025

મોરબીની બહાદુરગઢ શાળામાં કન્યા કેળવણી મહોત્સવ અને શાળા પ્રવેશોત્સવ અંતર્ગત ભૂલકાઓને પ્રવેશ અપાયો

મોરબી,ગુજરાત સરકાર દ્વારા વર્ષ 2002 થી શરૂ કરેલી પરંપરા એટલે કન્યા કેળવણી મહોત્સવ અને શાળા પ્રવેશોત્સવ જેમાં સમગ્ર રાજ્યમાં સતત ત્રણ દિવસ સુધી રાજ્યની તમામ શાળાઓમાં મુખ્યમંત્રીથી માંડી તમામ અધિકારીઓ પદાધિકારીઓ ગામેગામ જઈ નાના બાલુડાંઓ,ભૂલકાઓને વાજતે ગાજતે શાળામાં પ્રવેશ અપાવે છે,જેના કારણે એક સમયે શાળા છોડી જનારા શાળાથી વંચિત રહેનારા 25% જેટલા બાળકો હતા આજે એ રેશિયો ઘટીને 2% જ રહ્યો છે સરકારી શાળાઓ સમૃદ્ધ બની છે,સુવિધાયુક્ત બની છે ત્યારે મોરબીની બહાદુરગઢ પ્રાથમિક શાળામાં બાળકોને મહાનુભાવોની પ્રેરક ઉપસ્થિતમાં ધામધૂમપૂર્વક પ્રવેશોત્સવ ઉજવાયો જેમાં સરકાર, સમાજ શિક્ષકોનો સમનવય થાય તેવો સુંદર કાર્યક્રમ આજ રોજ બહાદુરગઢ પ્રાથમિક શાળાના પ્રાંગણમા રામપર મધુપુર બહાદુરગઢ ત્રણે શાળાના સંયુક્ત ઉપક્રમે પ્રવેશ પામતા બાળકોને હરખભેર પ્રવેશ આપવામાં આવ્યો હતો. જેમાં મોરબી સીટી મામલતદાર હસમુખભાઈ મારવાણીયા, ભરતભાઈ મોઢવાડીયા સી.આર.સી.કો.ઓર્ડીનેટર તેમજ અન્ય અધિકારીઓ જોડાયા હતા,સમગ્ર કાર્યકમને સફળ બનાવવા શાળાના આચાર્ય પ્રદિપભાઈ કુહાડીયા તેમજ શિક્ષકોએ ભારે જહેમત ઉઠાવી હતી.

મોરબીના રામધન આશ્રમ ખાતે અષાઢી બીજની ભવ્ય ઉજવણી

મહંતશ્રી ભાવેશ્વરીમાંના સાનિધ્યમાં અષાઢી બીજ પર્વ ઉજવણી કરવામાં જેમાં સવારે ધ્વજારોપણ, બપોર તેમજ સાંજે મહાપ્રસાદ રાત્રે રામદેવપીરના પાટ, તેમજ નામી અનામી કલાકારો નો સંતવાણી કાર્યક્રમ યોજાયો હતો મહેન્દ્રનગર, મોરબી સહિત બહાર ગામના લોકો એ દર્શન અને મહાપ્રસાદ નો લાભ લીધો હતો. આ કાર્યક્રમને સફળ બનાવવા માટે આશ્રમના સેવકો ભાઈઓ બહેનોએ જહેમત ઉઠાવી હતી તેમ મુકેશ ભગતની યાદી જણાવેલ છે

મોરબીની પીએમશ્રી માધાપરવાડી શાળાની બાળાઓને મનગમતી વસ્તુ મળતા ખુશખુશાલ

મોરબીના માધાપરવાડી કન્યા શાળામાં શૈક્ષણિક કીટ અર્પણ કરવા બદલ જોય ઓફ ગિવિંગ ગ્રુપના દાતાઓનું મહાનુભાવોના હસ્તે સન્માન કરાયું

મોરબી એટલે દાનવીર દાતાઓની ભૂમિ અહીંના લોકો પોતાની પરસેવાની કમાણી પરસેવા માટે વાપરવા પાવધરા છે, મોરબીમાં આબાલ, વૃદ્ધ, પશુ, પક્ષીઓ દરેક માટે કંઈકને કંઈક સેવાકાર્યો કરતા રહે છે, ત્યારે મોરબીની પીએમશ્રી માધાપરવાડી કન્યા શાળાની અનેકવિધ સહ અભ્યાસિક, મુલ્યલક્ષી પ્રવૃત્તિઓ મોરબીના જાગૃત અને સકારાત્મક અભિગમ સાથે કામ કરતા સોસીયલ મીડિયા,પ્રિન્ટ મીડિયા ઇલેક્ટ્રોનિક મીડિયાના માધ્યમથી મોરબીના નિવૃત પોસ્ટ માસ્ટર ભાવિ રાવલ અને એમના મિત્ર મંડળના ગ્રુપ જોય ઓફ ગિવિંગ અને ગંગા ચેરીટેબલ ટ્રસ્ટ સુધી પહોંચતા કન્યા કેળવણી મહોત્સવ અને શાળા પ્રવેશોત્સવ દરમ્યાન તરફથી શાળાના 400 બાળકોને આ મુજબની વિદ્યા સહાય અર્પણ કરવામાં આવી બાલવાટિકાની દરેક વિદ્યાર્થીનીઓને 1 લંચ બોક્સ ધોરણ 1 અને 2 ના દરેક વિદ્યાર્થીને 2 નંગ ક્રોસ લાઈન નોટ બુક 144 પેજની તેમજ 1 પેન્સિલ બોક્સ ધોરણ 3 અને 4 દરેકને 2 નંગ ડબલ લાઈન નોટ બુક પેજ 144 તેમજ 1 પેન્સિલ બોક્સ ધોરણ 5 થી 8 દરેકને 5 નંગ ફૂલસ્કેપ ચોપડા તથા પાંચ-પાંચ પેન બાળાઓને પોતાના રોજ બરોજના શિક્ષણકાર્યમાં ઉપયોગી મનગમતી વસ્તુ પ્રાપ્ત થતાં ખુશખુશાલ થઈ ગઈ અને જોય ઓફ ગિવિંગ ગ્રૂપના સભ્યો આપીને આનંદ પ્રાપ્ત કર્યો,જોય ઓફ ગિવિંગ ગ્રુપ મોરબી સરકારી શાળાએ જતા ધોરણ 1 થી 8 ના વિદ્યાર્થીઓને વિદ્યા સહાયનું કાર્ય વર્ષ 2012 થી કરે છે. આ ગ્રુપમાં કોઈ પ્રમુખ કે કોઈ હોદ્દાઓ નથી. તેમજ કોઈ બેંક એકાઉન્ટ પણ નથી ગ્રુપ મેમ્બરના સહયોગથી આ કાર્ય ચાલે છે. આ ગ્રુપની સ્થાપના ભાવિપ્રસાદ રાવલ નિવૃત પોસ્ટ માસ્તર મોરબી દ્વારા કરવામાં આવેલ હતી. તેમજ સહસ્થાપક ઘનશ્યામભાઈ અઘારા અજયભાઈ અન્નડકટ તેમજ સીતારામભાઈ રામાનુજ છે. બાળાઓને વિદ્યા સહાય આપવા બદલ શાળા પરિવાર વતી પ્રિન્સિપાલ દિનેશભાઈ વડસોલાએ દાતાઓનું સાલ ઓઢાડી સન્માન કર્યું હતું અને શાળા પરિવાર વતી આભાર પ્રકટ કર્યો હતો.

રેન્જ આઈ જી અશોક કુમાર યાદવ દ્વારા એસપી રાહુલ ત્રિપાઠી ડીવાયએસપી સમીર સારડા પીઆઇ સહિતના સ્ટાફને પ્રશંસાપત્ર આપી શુભેચ્છાઓ પાઠવી

મોરબી જિલ્લાના ટંકારા પોલીસ મથક વિસ્તારમાં રાજકોટ નાં આંગણીયા પેઢીના માલિકની કારને ટક્કર મારી આંતરીને ચકચારી ૯૦ લાખની લુંટના ગુનામાં બે અલગ અલગ કારમાં આવેલા લુંટારૂઓના બે સાગરિતોને તાત્કાલિક નાકાબંધી કરી ગણતરીની કલાકોમાં દબોચી લઈ લુંટ નો ભેદ ઉકેલ્યો હતો ટંકારા પોલીસની આ પ્રસંશનીય અને સરાહનીય કામગીરી બદલ રાજકોટ રેન્જ આઇ.જી અશોક કુમાર યાદવ દ્વારા ટંકારા પોલીસ મથક નાં પીઆઈ કે.એમ.છાસીયા સહિતના સ્ટાફને પ્રશંસાપત્ર એનાયત કરવામાં આવ્યા હતાં તાજેતરમાં જ મેં ૨૦૨૫ માં રાજકોટ મોરબી હાઇવે પર ટંકારા ખજુરા હોટલ પાસે બે કારમાં આવેલા લુટારુઓએ રાજકોટના આંગણીયા પેઢીના માલિકની કારને ટક્કર મારી આંતરીને 90 લાખની લુંટ કરી હતી આ ઘટનાની જાણ થતા જ ટંકારા પોલીસે બનાવની ગંભીરતા ધ્યાને લઈને તાત્કાલિક નાકાબંધી કરી લુંટ ધાડને અંજામ આપનાર બે આરોપીઓને દબોચી લીધા હતા આ કેસમાં પોલીસે અત્યાર સુધીમાં 82 લાખની રિકવરી પણ કરી છે ત્યારે રાજકોટ વિભાગ નાં રેન્જ આઈ જી અશોક કુમાર યાદવ દ્વારા ટંકારા પોલીસ મથકના પીઆઇ કે.એમ.છાસીયા સહિતના પોલીસ સ્ટાફ ની ટીમને પ્રશંસાપત્ર એનાયત કરવામાં આવ્યો છે તેમજ રાજકોટ રેન્જ આઇ જી અશોક કુમાર યાદવએ સમગ્ર પોલીસ સ્ટાફ ની પ્રસંશનીય કામગીરીને બિરદાવી શુભેચ્છા પાઠવી હતી

શાળા પ્રવેશોત્સવની ફલશ્રુતિ; ડ્રોપ આઉટ રેશિયામાં ઘટાડો થયો, બાળકો હોંશે હોંશે શાળાએ આવતા થયા કલેક્ટરશ્રી કે.બી. ઝવેરી

નાની વાવડી ખાતે આંગણવાડી તથા પ્રાથમિક અને માધ્યમિક શાળા મળી ૧૭૨ બાળકોને શાળાઓમાં હરખભેર આવકારાયા

મોરબીમાં જિલ્લા કલેક્ટરશ્રી કે.બી.ઝવેરીના અધ્યક્ષસ્થાને નાની વાવડી ખાતે નાની વાવડી કુમાર શાળા અને કન્યા શાળા તથા માધ્યમિક શાળાઓમાં નવા પ્રવેશપાત્ર બાળાઓને અંતરથી આવકાર આપવા માટે કન્યા કેળવણી મહોત્સવ અને શાળા પ્રવેશોત્સવ અન્વયે કાર્યક્રમ યોજાયો હતો.
પ્રાસંગિક ઉદ્બોધનમાં કલેક્ટરશ્રીએ જણાવ્યું હતું કે, દરેક કન્યાઓને શિક્ષણ મળે અને કોઈ પણ બાળક શિક્ષણ વિના ન રહે તેવા હેતુ સાથે કન્યા કેળવણી મહોત્સવ અને શાળા પ્રવેશોત્સવ શરૂ કરાવ્યો હતો એ કાર્યક્રમની ફલશ્રુતિ આજે આપણે જોઈ શકીએ છીએ જેના કારણે ડ્રોપ આઉટ રેશિયામાં ઘટાડો થયો છે અને બાળકો હોંશે હોંશે શાળાએ આવતા થયા છે. તેમણે દરેક બાળક શિક્ષણ મેળવે અને શાળાઓમાં પોષણક્ષમ આહાર મળે તેની તકેદારી રાખવા જણાવ્યું હતું. ઉપરાંત દરેક બાળક ભણે અને ખૂબ આગળ વધે તેવી શુભેચ્છાઓ પાઠવી હતી.
‘ઉત્સવ….બાળકોના સર્વાંગી વિકાસનો’ ના સૂત્ર સાથે ‘પ્રવેશોત્સને સમાજોત્સવ બનાવવા’ના ઉદેશ્યથી સમગ્ર રાજ્યમાં યોજાઈ રહેલા કાર્યક્રમોની સાથે મોરબીમાં નાની વાવડી ખાતે આયોજિત કાર્યક્રમમાં આંગણવાડી, પ્રાથમિક અને માધ્યમિક શાળાઓમાં નવા પ્રવેશપાત્ર બાળકોને કલેક્ટરશ્રી સહિતના મહાનુભાવોએ હરખભેર આવકાર્યા હતા. મહાનુભાવોના હસ્તે બાળકોને શૈક્ષણિક કીટ અર્પણ કરી તેમને ઉષ્માભેર શાળામાં વધામણા કરવામાં આવ્યા હતા અને દાતાશ્રીઓનું સન્માન કરવામાં આવ્યું હતું. ઉપરાંત કલેક્ટરશ્રી સહિત મહાનુભાવોના હસ્તે વૃક્ષારોપણ કરવામાં આવ્યું હતું.
નાની વાવડી ખાતે આંગણવાડીમાં ૧૨ કુમાર અને ૧૬ કન્યા મળી ૨૮ બાળકો, ધોરણ ૧ માં ૪૬ કુમાર અને ૩૬ કન્યા મળી ૮૨ બાળકો તથા ધોરણ ૯ માં ૩૦ કુમાર અને ૩૨ કન્યા મળી ૬૨ બાળકોને પ્રવેશ આપવામાં આવ્યો હતો. આ કાર્યક્રમ ઉપરાંત કલેક્ટરશ્રીએ આંબાવાડી શાળા અને રાજપર પ્રાથમિક શાળા ખાતે યોજાયેલ કાર્યક્રમમાં હાજરી આપી હતી. જ્યાં તેમણે કુલ ૧૪૭ બાળકોને પ્રવેશ અપાવ્યો હતો.
આ કાર્યક્રમમાં જિલ્લા પંચાયતના સદસ્યશ્રી જયંતીભાઈ પડસુંબીયા, તાલુકા પંચાયતના સદસ્યશ્રી રમાબેન રૂપાલા, મદદનીશ પશુપાલન નિયામકશ્રી ડો. એન.જે. ફળદુ, સહાયક માહિતી નિયામકશ્રી પારુલબેન આડેસરા, નાની વાવડી ગામના અગ્રણીશ્રીઓ, શાળાના આચારશ્રી અને શિક્ષકશ્રીઓ, વાલીઓ અને બાળકો બહોળી સંખ્યામાં ઉપસ્થિત રહ્યા હતા.