મોરબીમાં વર્ષ ૨૦૧૫માં થયેલ માસૂમ નિખિલ ધામેચા હત્યા કેસમાં નવી હલચલ સર્જાઈ છે. હાઇકોર્ટના આદેશ બાદ તપાસ હાથ ધરનાર સીબીઆઈને હવે મહત્વપૂર્ણ અને મજબૂત પુરાવા હાથ લાગ્યા છે. આ પુરાવાઓના આધારે આવનારા દિવસોમાં હત્યારાઓ બેનકાબ થશે તેવી આશા વ્યક્ત થઈ રહી છે. નિખિલ ધામેચા માત્ર ૧૪ વર્ષનો વિદ્યાર્થી હતો, જેનું અપહરણ થઈ ત્રણ દિવસ પછી રામઘાટ પાસે બાચકામાંથી હત્યા કરાયેલ લાશ મળી આવી હતી. તેના શરીર પર છરીના અસંખ્ય ઘા મારી નિર્મમ હત્યા કરવામાં આવી હતી. શરૂઆતમાં મોરબી શહેર પોલીસ અને બાદમાં સીઆઈડી ક્રાઈમે તપાસ કરી હતી, પરંતુ કોઈ ઉકેલ ન મળતાં પરિવારજનોએ હાઇકોર્ટમાં અરજી કરી હતી. હાઇકોર્ટે કેસ સીબીઆઈને સોંપવાનો હુકમ આપ્યો હતો. હવે સીબીઆઈની તપાસમાં મહત્વના તાર જોડાતા પરિવારને ન્યાયની નવી આશા મળી છે. માસૂમ નિખિલ હત્યા કેસમાં દસ વર્ષથી ચાલી રહેલી ન્યાયયાત્રા હવે અંતિમ ચરણમાં પહોંચી હોવાનું માનવામાં આવી રહ્યું છે. ત્યારે મોરબી શહેરમાં ફરી એકવાર આ ચકચારી કેસ ચર્ચાનો વિષય બન્યો છે. મોરબીમાં વર્ષ ૨૦૧૫માં સમગ્ર સૌરાષ્ટ્રને હચમચાવી મૂકનાર માસૂમ નિખિલ ધામેચા હત્યા કેસમાં એક મહત્વપૂર્ણ વળાંક આવ્યો છે. હાઇકોર્ટના આદેશ બાદ તપાસ સંભાળનાર સીબીઆઈ ટીમને તાજેતરમાં કેટલીક મજબૂત કળીઓ અને પુરાવાઓ હાથ લાગ્યા હોવાનું અત્યંત વિશ્વસનીય સૂત્રો દ્વારા જાણવા મળ્યું છે. આ પુરાવાઓના આધારે તપાસની ગતિ વધુ વેગવાન બની છે અને નજીકના દિવસોમાં હત્યારાઓ બેનકાબ થઈ શકે છે એવી ચર્ચા મોરબી શહેરમાં જોર પકડી છે. હત્યા કેસની સંપૂર્ણ વિગતો મુજબ મોરબીના દરજી કામ કરતા એક સામાન્ય પરિવારમાં જન્મેલો ૧૪ વર્ષનો નિખિલ પરેશભાઈ ધામેચા, તપોવન વિદ્યાલયમાં અભ્યાસ કરતો હતો. તા. ૧૫ ડિસેમ્બર ૨૦૧૫ના રોજ શાળાએથી છૂટ્યા બાદ તે અચાનક લાપતા થયો હતો. તેની સાઇકલ શાળાની નજીકથી મળી આવતાં પોલીસે શરૂઆતમાં અપહરણનો ગુનો નોંધી તપાસ હાથ ધરી હતી. પોલીસને મળેલા પ્રારંભિક પુરાવાઓ મુજબ શાળાનાં એક વિદ્યાર્થીએ જણાવ્યું હતું કે નિખિલને અજાણ્યા યુવક સાથે બાઇકમાં જતો જોયો હતો. સીસીટીવી ફૂટેજમાં પણ નિખિલ જેવો બાળક એક્ટિવા પર પાછળ બેસેલો દેખાયો હતો, પરંતુ ચહેરો સ્પષ્ટ ન હોવાથી ઓળખ શક્ય બની નહોતી. અપહરણના ત્રણ દિવસ પછી મોરબીના રામઘાટ નજીક કોથળામાંથી નિખિલનો મૃતદેહ મળી આવ્યો હતો. તેના શરીર પર છરીના અનેક ઘા મારવામાં આવી હત્યા નિપજાવવામાં આવી હતી. પોલીસે તે સમયની તમામ સંભાવનાઓ તપાસી, પરંતુ આરોપીની ઓળખ થઈ શકી નહોતી. તપાસ મોરબી સીટી એ ડિવિઝન પોલીસથી લઈ સીઆઈડી ક્રાઈમ સુધી પહોંચી હતી, છતાં કોઈ નવો તાર મળી ન શક્યો. જે બાદ મૃતક નિખિલના પરિવારજનોએ ન્યાય માટે સતત પ્રયત્નો કર્યા હતા, આખરે વર્ષ ૨૦૨૪માં નિખિલના પિતાએ ગુજરાત હાઇકોર્ટમાં અરજી કરી, જેમાં તેમણે તપાસ સીબીઆઈને સોંપવાની માંગણી કરી હતી. તે અરજી પર સુનાવણી બાદ તા. ૧૬ ઓગસ્ટ ૨૦૨૪ના રોજ હાઇકોર્ટ દ્વારા તપાસ સીબીઆઈને સોંપવાનો આદેશ આપવામાં આવ્યો હતો. ત્યારથી સીબીઆઈની વિશેષ ટીમે કેસની ફાઇલો, અગાઉની તપાસની નોંધો અને ટેકનિકલ પુરાવાઓનું પુનઃ વિશ્લેષણ શરૂ કર્યું હતું. નિખિલ ધામેચાના પિતા દ્વારા અગાઉ મોરબી સ્વામિનારાયણ મંદિરના સ્વામી ઉપર હત્યા કર્યાના આક્ષેપો કરવામાં આવ્યા હતા, ત્યારે સૂત્રો પાસેથી મળેલ માહિતી મુજબ, નિખિલના પિતા દ્વારા લગાવવામાં આવેલ તમામ આરોપોની દિશામાં પણ સીબીઆઈ ટીમ દ્વારા તપાસ કરવામાં આવી હતી. જેમાં અલગ અલગ મજબૂત પુરાવા અને સાક્ષીઓ મેળવેલ છે. હાલ મળતી માહિતી મુજબ સીબીઆઈને કેટલાક મજબૂત પુરાવા, તથા કેટલાક શંકાસ્પદ લોકોના નિવેદનો પરથી મહત્વપૂર્ણ તાર જોડાયા છે. સૂત્રો પાસેથી મળતી માહિતી મુજબ, આ તારના આધારે હત્યારાઓની ઓળખ નિકટના ભવિષ્યમાં જાહેર થઈ શકે છે. મોરબીમાં વર્ષોથી હત્યાના અનડીટેક્ટ કેસમાં હવે નવી આશાનો કિરણ દેખાયો છે. સીબીઆઈની તપાસ અને નવા પુરાવાઓના આધારે, માસૂમ નિખિલ ધામેચાના હત્યારાઓ બેનકાબ થવા હવે માત્ર થોડો સમય છે તેવુ લોકમુખે ચર્ચાએ જોર પકડ્યું છે.
ઇન્ડિયા ટીવી , ગુજરાત ફર્સ્ટનાં રિપોર્ટર અને ઇન્ડિયા એક્ઝેટ ન્યૂઝના ફાઉન્ડર નિલેશભાઈ પટેલનો આજે જન્મ દિવસ
મોરબી જિલ્લામાં છેલ્લા 17 વર્ષ કરતા પણ વધારે સમય થી અલગ અલગ સમાચાર પેપરમા પત્રકાર તરીકે ફરજ બજાવી હાલ દેશની નામી ન્યૂઝ ચેનલ ઈન્ડિયા ટીવી તેમજ ગુજરાતની ઝડપી થી વિકસતી ગુજરાત ફર્સ્ટ ન્યૂઝ ચેનલના મોરબી જિલ્લાના પત્રકાર તરીકે ફરજ બજાવતા અને ઇન્ડિયા એક્ઝેટ ન્યૂઝના ફાઉન્ડર નિલેશભાઈ પટેલનો આજે જન્મ દિવસ છે. મિલનસાર સ્વભાવ અને હંમેશા તમામ લોકોની મદદ માટે તત્પર હાલની સામાજિક સમસ્યા વિશે બેબાક મંતવ્ય આપતા ઊંડા વિચારશીલ વ્યક્તિત્વ ધરાવતા નીલેશભાઈ પટેલને તેમના જન્મ દિવસ નિમિત્તે પરિવાર ,મિત્રો સામાજિક અને રાજકીય. આગેવાનો દ્વારા તેમના મોબાઈલ ન 7984347007 ઉપર શુભેચ્છાઓ પાઠવવામાં આવી રહી છે
મોરબી સિરામિક ઉદ્યોગ એસો. પ્રમુખોએ શ્રમ કૌશલ્ય અને રોજગાર મંત્રી કાંતિભાઈ અમૃતિયા સાથે મુલાકાત કરી શુભેચ્છાઓ પાઠવી
મોરબી સિરામિક એસોસિએશન પ્રમુખ મનોજભાઈ એરવાડિયા અને હરેશભાઈ બોપલિયા એ ગુજરાત સરકારના શ્રમ કૌશલ્ય અને રોજગાર વિભાગના રાજ્યમંત્રી કાંતિભાઈ અમૃતિયા ની આજ રોજ શુભેચ્છા મુલાકાત કરી હતી જેમાં સીરામીક એસોસિયેશન પ્રમુખો તરફથી રાજ્યકક્ષાના મંત્રી તરીકે જવાબદારી મળવા બદલ રૂબરૂ મુલાકાત કરી ને સમગ્ર સિરામિક ઉદ્યોગ તરફથી શુભકામનાઓ પાઠવી હતી. સાથો સાથ શ્રમ અને રોજગાર મંત્રાલય ને લગતા વિવિધ પ્રશ્નો ની ચર્ચા ઉંડાણ પુર્વક કરી હતી. તેમજ રાજ્યકક્ષાના મંત્રી કાંતિભાઇ અમૃતિયાએ ખાતરીપૂર્વક જણાવ્યું હતુ કે સિરામિક ઉધોગને લગતા કોઈ પણ પ્રશ્નો આવે તો તત્કાલીન મને જાણ કરો હું તમામ પ્રશ્નો ના નિરાકરણ માટે સતત પ્રયત્નશીલ રહી ને સકારાત્મક પરિણામ મળે તે દિશા માં પ્રયત્નો કરીશ.
હળવદ – ભારતીય સંસ્કૃતિના વારસાને જીવંત રાખવા અને વિદ્યાર્થીઓની સુષુપ્ત શક્તિઓને પ્રોત્સાહન આપવાના ઉમદા હેતુથી જુના અમરાપર શાળાના પટાંગણમાં દિવાળી પર્વની ઉજવણીના ભાગરૂપે ભવ્ય “રંગોળી સ્પર્ધા”નું આયોજન કરવામાં આવ્યું હતું. આ કાર્યક્રમનો મુખ્ય ઉદ્દેશ્ય વિદ્યાર્થીઓને આપણી પરંપરાઓ સાથે જોડવાનો અને તેમનામાં રહેલી કલાત્મક પ્રતિભાને એક મંચ પૂરું પાડવાનો હતો. આ સ્પર્ધામાં શાળાના વિદ્યાર્થીઓએ ખૂબ જ ઉત્સાહભેર ભાગ લીધો હતો. શાળાનું મેદાન વિદ્યાર્થીઓની કલ્પનાશક્તિ અને રંગોના સુભગ સમન્વયથી જીવંત બની ઉઠ્યું હતું. વિદ્યાર્થીઓએ પરંપરાગત, સામાજિક સંદેશા આધારિત અને આધુનિક એમ વિવિધ પ્રકારની મનમોહક રંગોળીઓ બનાવી પોતાની આગવી કલાનું પ્રદર્શન કર્યું હતું. આ પ્રસંગે શાળાના આચાર્યશ્રી વાઘેલા અમરશીભાઈ એ જણાવ્યું કે, “રંગોળી એ માત્ર કલા નથી, પરંતુ આપણી સંસ્કૃતિનું પ્રતિબિંબ છે. આવા કાર્યક્રમોથી વિદ્યાર્થીઓમાં સર્જનાત્મકતા, ટીમવર્ક અને સાંસ્કૃતિક મૂલ્યોનું સિંચન થાય છે. તમામ વિદ્યાર્થીઓનો ઉત્સાહ અને કલા ખરેખર પ્રશંસનીય છે.” સ્પર્ધાના અંતે વિજેતા વિદ્યાર્થીઓને ઇનામ અને પ્રમાણપત્ર આપીને સન્માનિત કરવામાં આવ્યા હતા. આ સમગ્ર કાર્યક્રમને સફળ બનાવવા બદલ શાળાના શિક્ષકગણ અને સ્ટાફે ભારે જહેમત ઉઠાવી હતી.
મોરબીમાં વિકાસ સપ્તાહ અંતર્ગત મણીમંદિર થી ગાંધીજીના સ્ટેચ્યુ ત્રિકોણ બાગ સુધી વિકાસ પદયાત્રા યોજાઈ હતી જેમાં મોરબી કલેક્ટરશ્રી કે.બી. ઝવેરી સહિત જિલ્લાના ઉચ્ચ અધિકારીશ્રીઓ જોડાયા હતા. વિકાસ સપ્તાહની ઉજવણીના ભાગરૂપે યોજાયેલી આ વિકાસ પદયાત્રાને મહાનુભાવોએ લીલી જંડી બતાવી મણીમંદિર થી પ્રસ્થાન કરાવી હતી. ત્રિકોણ બાગ ખાતે ગાંધીજીના સુતરની આંટી પહેરાવી વિકાસ પદયાત્રાની પુર્ણાહુતિ કરવામાં આવી હતી. આ પ્રસંગે સર્વે ઉપસ્થિતોએ વિકાસ ભારત પ્રતિજ્ઞા લીધી હતી. આ વિકાસ પદયાત્રામાં ઈન્ચાર્જ જિલ્લા વિકાસ અધિકારીશ્રી અને જિલ્લા ગ્રામ વિકાસ એજન્સીના નિયામકશ્રી નવલદાન ગઢવી, નાયબ જિલ્લા વિકાસ અધિકારીશ્રી શૈલેષચંદ્ર ભટ્ટ, મોરબી પ્રાંત અધિકારીશ્રી સુશીલ પરમાર, મોરબી મહાનગરપાલિકાના ડેપ્યુટી કમિશ્નરશ્રી કુલદીપ સિંહ વાળા, નાયબ જિલ્લા પોલીસ અધિક્ષકશ્રી વિરલ દલવાડી સહિત વહીવટી તંત્રના ઉચ્ચ અધિકારીશ્રીઓ તથા કર્મચારીશ્રીઓ, પોલીસ કર્મીઓ, વિદ્યાર્થીઓ તેમજ મોરબીવાસીઓ જોડાયા હતા
